شہباز شریف کے بغیر حکومت کا آگے بڑھنا مشکل،اپوزیشن لیڈر کی کہاں کہاں ضرورت؟ (بی بی سی رپورٹ )

لاہور(جی سی این رپورٹ)یہ کہا جاسکتا ہے کہ اس وقت پارلیمنٹ میں ایک بحرانی سی کیفیت ہے، قومی مسائل کے حوالے سے ضروری ہے کہ اپوزیشن اور کم از کم اپوزیشن کی سب سے بڑی جماعت ن لیگ اور تحریک انصاف کے مابین مفاہمت ہو، قومی معاملات پر ایک صفحے پر آنا چاہئے اور اس کے بغیر کام نہیں چلے گا۔
تاہم لگتا ہے کہ اس معاملے میں وزیر اعظم عمران خان کو اپوزیشن لیڈر شہباز شریف سے براہ راست صلاح مشورہ کرنا پڑے گا کیونکہ یہ آئین کی ذمہ داری ہے۔ انتہا پسندی کی بیخ کنی کے لئے اپوزیشن اور حکومت کو کئی معاملات پر اکٹھا ہونا ہے کیونکہ قانون سازی ہونی ہے، فوجی عدالتوں کی مدت اب ختم ہو رہی ہے، اس کے لئے بھی ضروری ہے کہ حکومت اور حزب اختلاف کے درمیان براہ راست مذاکرات ہوں اور وزیر اعظم عمران خان اپوزیشن لیڈر شہباز شریف سے ورکنگ ریلیشن شپ قائم کریں۔ مگر لگتا ہے وزیر اعظم عمران خان کی ہر ممکن کوشش ہے کہ وہ کسی صورت میں شہباز شریف سے براہ راست بات نہ کریں۔ بات کرنا تو دور، وہ ان سے آنکھیں ملانے کے لئے بھی تیار نہیں۔ مصافحہ تو دور کی بات ہے قومی اسمبلی کے اجلاس کے دوران بھی وزیر اعظم کی ہر ممکن کوشش رہی کہ اپوزیشن لیڈر شہباز شریف سے ان کی آنکھیں چار نہ ہوں۔ لیکن قومی معاملات کے لئے عمران خان کو ہر صورت شہباز شریف سے ملنا ہوگا، یہ صورتحال برقرار رہی تو تحریک انصاف کی حکومت کو اپنے ایجنڈا کو مکمل کرنا شاید ممکن نہ ہوگا۔
اس حوالے سے وفاقی وزیر تعلیم شفقت محمود نے نجی ٹی وی پروگرام میں گفتگو کرتے ہوئے کہا اپوزیشن کو خود احساس ہونا چاہئے کہ قومی معاملات کیا ہیں؟ جن لوگوں نے سنگین طریقے سے عوام کو لوٹا ہے اور اب ان کے خلاف شہادتیں بھی موصول ہوتی جا رہی ہے، عوام بھی اس معاملے سے باخبر ہیں تو اب ان لوگوں کو کیا درجہ دیا جائے ؟ قومی مفاد کے معاملات میں کسی کو کہنے کی ضرورت نہیں ہے، اس پر اپوزیشن کو خود احساس ہونا چاہئے۔ شاہ محمود قریشی نے عمران خان کی رضا مندی سے ہی اپوزیشن کو خط لکھا، پارلیمنٹ میں حکومت کی کوشش ہے کہ بزنس ایڈوائزری کمیٹی میں تمام جماعتوں کے ساتھ بیٹھ کر قومی ایجنڈا کے بارے میں طے کریں یہ تمام چیزیں عمران خان کی اجازت اور ان کی ہدایت پر ہی ہو رہی ہیں۔ یہ تاثر درست نہیں کہ وہ مفاہمت نہیں چاہتے۔ عمران خان صرف پاکستان کو لوٹنے کے معاملے پر این آر او نہیں کرینگے یہ اصرار کرنا کہ عمران خان شہباز شریف سے بالمشافہ بات کریں اس حوالے سے عمران خان اپنے بنیادی نظریہ کے مخالف کسی شخص سے ملاقات نہیں کریں گے۔ ہماری پوری ٹیم اپوزیشن سے بات کرنے کو تیار ہے۔ انہوں نے کہا کہ میثاق معیشت کے لئے بالکل تیار ہیں ہم نے شہباز شریف کی تجویز کا خیر مقدم کیا ہے، وہ اپنی ٹیم بنائیں ہم اپنی ٹیم بنائیں گے۔
پروگرام میں گفتگو کرتے ہوئے اقتصاد ی ماہرڈاکٹر وقار مسعود نے کہا کہ اس وقت ساری دنیا کے اندر پاکستان کی معیشت کے حوالے سے تشویش پائی جا رہی ہے جو آئی ایم ایف کا پروگرام لینے سے ختم ہوجائیگی، مقامی سرمایہ کاری شروع ہوجائیگی، عمران خان نے جووعدے کئے ہیں وہ پورے کئے جا سکتے ہیں۔

The post شہباز شریف کے بغیر حکومت کا آگے بڑھنا مشکل،اپوزیشن لیڈر کی کہاں کہاں ضرورت؟ appeared first on Global Current News.

from Global Current News https://ift.tt/2WAEUtB
via IFTTT