![](https://static01.nyt.com/images/2019/02/24/opinion/sunday/24manjoo/24manjoo-mediumThreeByTwo440.jpg)
By NATALIE PROULX from NYT The Learning Network https://ift.tt/2XrdF6b
.FOCUS WORLD NEWS MEDIA GROUP EUROPE copy right(int/sec 23,2012), BTR-2018/VR.274058.IT-
اسلام آباد(جی سی این رپورٹ)پاکستان مسلم لیگ ن کے رہنما خواجہ آصف نے قومی اسمبلی میں خطاب کے دوران بھارت کی جانب سے لائن آف کنٹرول کی خلاف ورزی کی مذمت کرتے ہوئے کہا کہ اس مشکل وقت میں پوری قوم پاک فوج کے ساتھ کھڑی ہے اور بھارت کی جانب سے پاکستان میں دراندازی کا متحدہ ہو کر جواب دیا جائے اور فوری طور پر آج ہی کے دن پارلیمنٹ کا مشترکہ اجلاس بلایا جائے۔انہوں نے کہا کہ یہ ہمارے لیے زندگی اور موت کا مسئلہ ہے کہ ہم اپنی فوج کے ساتھ متحدہ ہو کر کھڑے رہیں اور اس پارلیمنٹ کا اس ملک کے اتحاد کی علامت بننا چاہیے۔مسلم لیگ (ن) کے رہنما نے کہا کہ کچھ وقت کے لیے اپنے تمام تر سیاسی اختلافات بھلا کر اس موقع پر ہمیں اپنی فوج کے پیچھے سیسہ پلائی ہوئی دیوار کی طرح کھڑا ہونا چاہیے ۔خواجہ آصف نے کہا کہ ہمارے حکومت سے معیشت اور حکومت چلانے کے امور پر متعدد اختلافات ہیں لیکن اس معاملے پر پورا پاکستان متحد ہے۔
دبئی (جی سی این رپورٹ ) پاکستان سپر لیگ (پی ایس ایل) کے 16ویں میچ میں ملتان سلطانز نے شاندار باؤلنگ اور بیٹنگ کا مظاہرہ کرتے ہوئے اسلام آباد یونائیٹڈ کو 6 وکٹوں سے شکست دے کر اہم 2 پوائنٹس حاصل کرلیے۔دبئی اسپورٹس سٹی میں کھیلے جانے والے اس میچ میں ملتان سلطانز کے کپتان شعیب ملک نے ٹاس جیت کر پہلے باؤلنگ کرنے کا فیصلہ کیا۔ملتان سلطانز کے باؤلرز حریف ٹیم پر ابتدا سے ہی چھائے رہے اور اسلام آباد یونائیٹڈ کے کسی بھی کھلاڑی کو کھل کر کھیلنے نہیں دیا۔گزشتہ میچ کی طرح کیمرون ڈیلپورٹ اس مرتبہ بھی یونائیٹڈ کے لیے کچھ نہ کر سکے اور 4 رنز بنا کر پہلے ہی اوور میں محمد الیاس کا شکار بنے۔دوسری جانب سے جارح مزاج لیوک رونکی نے اپنا روایتی کھیل جاری رکھا اور اسکور کو 34 رنز تک پہنچایا لیکن اس مقام پر صاحبزادہ فرحان نعمان علی کی گیند پر اسٹمپ آؤٹ ہوگئے۔اسکور 42 تک ہی پہنچا تھا کہ لیوک رونکی گیند کو باؤنڈری کے باہر پہنچانے کی کوشش کرتے ہوئے محمد الیاس کی گیند پر شعیب ملک کے ہاتھوں کیچ آؤٹ ہوگئے۔
تاہم وکٹیں گرنے کا سلسلہ جاری رہا، لیکن اس دوران سمت پٹیل کی 20، آصف علی کی 22 اور فہیم اشرف کی 16 رنز کی مزاحمت کی وجہ سے اسلام آباد یونائیٹڈ 121 رنز بنا کر آؤٹ ہوگئی۔ملتان سلطانز کی جانب سے ڈینیئل کرسچن نے 3، شاہد آفریدی، نعمان علی اور محمد الیاس نے 2، 2 جبکہ محمد عرفان نے ایک کھلاڑی کو آؤٹ کیا۔جواب میں ملتان سلطانز کا شاندار آغاز ہوا، جہاں جیمز وینس اور عمر صدیق نے ٹیم کو 7 اوور میں 54 رنز کی پارٹنر شپ فراہم کی۔جیمز وینس 28 رنز بنانے کے بعد سمت پٹیل کی گیند پر 54 کے اسکور پر آؤٹ ہوئے تو وکٹ پر آنے والے جانسن چارلس 4 رنز بنانے کے بعد شاداب کی گیند پر 59 کے مجموعے پر ایل بی ڈبلیو ہوگئے۔کپتان شعیب ملک نے اوپنر عمر صدیق کے ہمراہ 40 رنز کی پارٹنرشپ قائم کرکے پی ایس ایل میں ٹیم کے لیے دوسری فتح کو یقین بنادیا۔عمر صادق 99 کے اسکور پر 46 رنز بنانے کے بعد رومان رئیس کی گیند پر کیچ آؤٹ ہوگئے
تاہم ان کی وکٹ سے ملتان سلطانز کی فتح کی جانب پیش قدمی متاثر نہیں ہوئی۔کپتان شعیب ملک نے ڈینیئل کرسچن کے ہمراہ ٹیم کو فتح سے ہمکنار کرواتے ہوئے پوائنٹس ٹیبل پر 2 اہم پوائنٹس دلوادیے۔ٹاس کے موقع پر شعیب ملک کا کہنا تھا کہ وہ گزشتہ میچز کی طرح غلطیاں نہ کرنے کی کوشش کریں گے جس کی وجہ سے ٹیم کو شکست کا سامنا کرنا پڑا تھا۔خیال رہے کہ یہ پی ایس ایل 2019 میں ملتان سلطانز کی دوسری کامیابی ہے جبکہ اس ٹیم کی پہلی کامیابی بھی اسلام آباد یونائیٹڈ کے ہی خلاف تھی جب گروپ کے پہلے میچ میں سلطانز نے 5 وکٹوں سے فتح سمیٹی تھی۔ملتان سلطانز اس وقت پوائنٹس ٹیبل پر 4 پوائنٹس اور بہتر رن اوسط کے ساتھ چوتھے نمبر پر آگئی جبکہ اسلام آباد یونائیٹڈ 6 پوائنٹس کے ساتھ تیسرے نمبر پر ہے۔
ابوظہبی (جی سی این رپورٹ)تنظیم تعاون اسلامی (او آئی سی) نے بھارت کی جانب سے پاکستان کی فضائی حدود کی خلاف ورزی اور بم پھینکنے کی شدید الفاظ میں مذمت کی ہے۔او آئی سی کی جانب سے سوشل میڈیا پر جاری بیان میں کہا گیا کہ تنظیم بھارت کی جانب سے پاکستانی فضائی حدود کی خلاف ورزی اور پاکستانی حدود میں 4 بم پھینکنے کی مذمت کرتی ہے۔تنظیم تعاون اسلامی کی جانب سے کہا گیا کہ پاکستان اور بھارت تحمل سے کام لیں اور خطے کا امن خراب کرنے والے اقدامات اٹھانے سے گریز کریں۔او آئی سی کی جانب سے مزید کہا گیا کہ دونوں فریق ذمہ داری کا مظاہرہ کرتے ہوئے موجودہ صورت حال کو طاقت کے استعمال کے بغیر ہی پرامن حل نکالنے کی کوشش کریں۔خیال رہے کہ بھارتی فضائیہ کی جانب سے گزشتہ رات پاکستانی فضائی حدود کی خلاف ورزی کی گئی اور بھارتی طیاروں نے پاکستانی علاقے میں بم بھی پھینکے لیکن پاک فضائیہ کی بروقت جوابی کارروائی کے باعث بھارتی طیارے فرار ہو گئے۔
اسلام آباد(جی سی این رپورٹ)وزیراعظم عمران خان نے 30 فیصد گیس صارفین سے زائد بلنگ کے ذریعے وصول کی جانے والی رقم واپس کرنے کی ہدایت کردی۔اسلام آباد میں وزیراعظم کی زیر صدارت گیس بلوں میں اضافے کے حوالے سے اعلیٰ سطح اجلاس ہوا جس میں عمران خان کو انکوائری رپورٹ پیش کی گئی۔اس حوالے سے بتایا گیا کہ پیش کردہ انکوائری رپورٹ میں یہ بات ثابت ہوئی کہ 30 فیصد گیس کے صارفین کو اضافی بل بھیجے گئے۔خیال رہے کہ 4 فروری کو معاملے کی تحقیقات کے لیے 4 رکنی کمیٹی تشکیل دی گئی تھی جس میں ایڈیشنل سیکریٹری (پالیسی) شیر افگن خان چیئرمین تھے۔اراکین کمیٹی میں ڈائریکٹر جنرل (گیس) شاہد یوسف، ڈائریکٹر جنرل عمران احمد، جنرل مینجر بلنگ شامل تھے۔اس حوالے سے وزیراعظم عمران خان نے کہا کہ ’جن 30 فیصد صارفین کو اضافی بل بھیجے گئے ان کو وصول شدہ تمام اضافی رقم واپس کی جائے‘۔ان کا کہنا تھا کہ ’زائد بلنگ کے ذمہ داران کے خلاف کاروائی کی جائے‘۔واضح رہے کہ 22 فروری کو قومی اسمبلی کے اجلاس میں پاکستان مسلم لیگ (ن) کے رہنما اور سابق وزیر اعظم شاہد خاقان عباسی نے گیس کے بلوں میں اضافہ عوام پر زیادتی قرار دیا تھا جس کے بعد اپوزیشن اراکین نے ایوان میں گیس کے بل پھاڑ کر پھینک دیے تھے۔گزشتہ سال 19 اکتوبر کو آئل اینڈ گیس ریگولیٹری اتھارٹی (اوگرا) نے سرکاری دفاتر، ہسپتالوں، تعلیمی اداروں سمیت کمرشل صارفین کے لیے گیس کی قیمتوں میں ایک ماہ کے دوران دوسری مرتبہ اضافہ کردیا تھا۔رہائشی کالونیز، کیپٹو پاور پلانٹ، فلاحی اداروں، سرکاری دفاتر، ہسپتالوں، مسلح افواج کے میس، یونیورسٹیز، کالجز، اسکولوں اور نجی تعلیمی اداروں کے لیے ماہانہ گیس فکسڈ چارجز میں 3 ہزار 6 سو روپے کا اضافہ کردیا گیاتھا۔ان تمام اداروں کے صارفین کے لیے گیس کے ماہانا فکسڈ چارجز ایک ہزار 53 روپے سے بڑھا کر 4 ہزار 680 روپے کیے گئے۔28 اگست 2018 کو گیس فراہم کرنے والی 2 کمپنیوں نے حکومت سے مطالبہ کیا تھا کہ گیس کی قیمتوں میں اضافے کا بوجھ صارفین پر ڈالا جائے تا کہ ایک سو 23 ارب ڈالر کے گردشی قرضوں کو کم کیا جاسکے جس کے باعث گیس کے پیدواری اور ترسیلی شعبے کو رقم کی کمی کا سامنا ہے۔گیس کی قیمتوں میں اضافے پر اپوزیشن کے احتجاج اور عوامی ردعمل کے نتیجے میں وزیراعظم عمران خان نے اس حوالے سے تحقیقات کا حکم دیا تھا۔خیال رہے کہ موسم سرما کے دوران ملک کے بیشتر علاقوں میں گیس کی لوڈشیڈنگ ایک معمول ہے اور کئی سالوں سے موسم سرما کے دوران گیس کی کمی شہریوں کے لیے ایک مسئلہ بن جاتی ہے۔گیس کی لوڈشیڈنگ سے جہاں صنعتی صارفین کو مشکلات کا سامنا کرنا پڑتا ہے وہیں گھریلو صارفین بھی پریشان نظر آتے ہیں۔گیس کی لوڈشیڈنگ کی وجہ سے گھریلو صارفین کو جہاں کھانا بنانے کے ساتھ ساتھ روز مرہ کے دیگر امور کو نمٹانے میں دشواری کا سامنا کرنا پڑتا ہے وہیں اس مسئلے کی وجہ سے ہوٹلوں کی انتظامیہ کو بھی شہریوں کی طلب کو پورا کرنے میں مشکلات پیش آتی ہیں۔
برازیلیا (جی سی این رپورٹ)دنیا بھر میں جنگلی حیات کے ماہرین کے ذہن اس وقت چکرا گئے جب برازیل کے ایمازون جنگلات کے اندر ایک 10 ٹن وزنی مردہ وہیل مچھلی کو دریافت کیا گیا۔ہمپ بیک وہیل دریائے ایمازون کے جزیرے ماراجو کے جنگلات میں دریافت کی گئی اور سائنسدان یہ سمجھنے سے قاصر ہیں کہ آخر ایک مچھلی سمندر سے اتنی دور اور وہ بھی جنگل کے اندر کیسے پہنچ گئی یا وہ ساحل سے دور کیسے ہوگئی۔مقامی محکمہ صحت، نکاسی آب اور ماحولیات کے مطابق انہیں 11 میٹر لمبی وہیل مچھلی اس وقت ملی جب پرندوں کی بڑی تعداد اس کے ڈھانچے پر ضیافت کے لیے اکھٹی ہوگئی۔یہ وہیل مچھلی جنگل میں اتنی دور تھی کہ ماہرین کو مطلوبہ مقام پر پہنچنے کے 2 دورے کرنا پڑے۔برازیل کے Bicho D’agua انسٹیوٹ کے بحری حیات کے ماہرین نے مچھلی کا معائنہ کیا جو ان کے بقول کئی دن پہلے مرچکی تھی۔انہوں نے بتایا کہ ہم اب تک یقین سے نہیں کہہ سکتے کہ یہ آخر یہاں تک کیسے پہنچ گئی مگر اندازہ لگاسکتے ہیں کہ یہ ساحل کے قریب تیر رہی ہوگی اور تند و تیز لہروں کے نتیجے میں وہ ان جنگلات میں آگری۔انہوں نے کہا کہ یہ واقعہ انتہائی حیرت انگیز ہے اور ہم اب تک الجھن کا شکار ہے کہ برازیل کی شمالی ساحلی پٹی پر ایک ہمپ بیک وہیل کیا کررہی تھی کیونکہ یہ انتہائی غیرمعمولی ہے۔عام طور پر برازیل کے جنوبی ساحلی علاقوں میں ہمپ بیک وہیل مچھلیاں اگست سے نومبر کے درمیان نظر آتی ہیں مگر وہ کبھی کبھار ہی ہزاروں میل دور شمالی حصے کا رخ کرتی ہیں جہاں ایمازون کا دہانہ ہے۔ماہرین کے مطابق یہ وہیل ممکنہ طور پر کم عمر تھی اور جنوب کی جانب جاتے ہوئے اپنی ماں سے الگ ہوگئی۔اب مقامی حکام کو اس وہیل مچھلی کے ڈھانچے کو ہٹانا بھی مسئلہ بن چکا ہے۔ان کا کہنا ہے کہ وہ جس جگہ پر موجود ہے وہاں تک رسائی بہت مشکل ہے اور کسی بلڈوزر کو وہاں پہنچانا ناممکن ہے ، اس لیے ڈھانچے کو ہٹانے کا کوئی راستہ نہیں۔تاہم ماہرین اس ڈھانچے کو محفوظ کرکے مزید تحقیق کے لیے کسی نیچرل ہسٹری میوزیم میں منتقل کریں گے۔
اسلام آباد(جی سی این رپورٹ)وزیر خارجہ شاہ محمود قریشی نے امریکی ہم منصب مائیک پومپیو سے ٹیلے فون پر رابطہ کر کے انہیں لائن آف کنٹرول پر بھارت کی جانب سے کی جانے والی جارحیت سے آگاہ کیا۔شاہ محمود قریشی نے مائیک پومپیو سے کہا بھارت سیاسی مقاصد اور انتخابات کے لیے جنوبی ایشیاء کے امن کو شدید خطرات سے دوچار کر رہا ہے لیکن پاکستان اپنی سالمیت پر سمجھوتا نہیں کر سکتا۔انہوں نے کہا کہ ہم بھارت کے عزائم کے حوالے سے دنیا کو پہلے ہی آگاہ کر چکے تھے اور پلوامہ واقعے کے بعد پاکستان نے بھارتی دھمکیوں کے باوجود انتہائی ذمے دارانہ رویہ اختیار کیا۔وزیر خارجہ نے کہا کہ بھارتی جارحیت سے افغانستان میں قیام امن کے لیے کی جانے والی کوششیں متاثر ہو سکتی ہیں۔ان کا کہنا تھا کہ بھارت یہ جارحانہ اقدام انتہائی قابل مذمت ہے اور ہم توقع کرتے ہیں کہ امریکا اس سلسلے میں اپنا کردار ادا کرے گا۔خیال رہے کہ گزشتہ رات بھارتی فضائیہ کی جانب سے پاکستانی فضائی حدود کی خلاف ورزی کی گئی تاہم پاک فضائیہ نے بروقت کارروائی کرتے ہوئے بھارتی طیاروں کو بھاگنے پر مجبور کر دیا۔
اسلام آباد(جی سی این رپورٹ)بھارت کی جانب سے پاکستانی فضائی حدود میں دراندازی کے بعد سینما ایگزی بیٹر ایسوسی ایشن نے بھارتی فلموں کی نمائش پر پابندی عائد کر دی۔پرنس وسیم نامی صارف نے اپنی ٹوئٹ میں لکھا کہ سوشل میڈیا پر مجاہد بننے والوں سے عرض ہے کہ جنگ لڑنے بے شک سرحد پر نہ جائیں بس بھارتی فلمیں اور گانے دیکھنا بند کر دیں، یہ بھی بھارت کو منہ توڑ جواب ہے۔سوشل میڈیا صارف نے وزیر اطلاعات فواد چوہدری کو ٹیگ کرتے ہوئے لکھا کہ حکومت سے بھی درخواست ہے کہ بھارتی فلموں اور ڈراموں پر پابندی عائد کی جائے۔وفاقی وزیر اطلاعات فواد چوہدری نے پرنس وسیم کے ٹوئٹ پر جواب دیتے ہوئے لکھا کہ سینما ایگزی بیٹر ایسوسی ایشن نے بھارتی مواد کا بائیکاٹ کر دیا ہے، کوئی بھی بھارتی فلم پاکستان میں ریلیز نہیں کی جائے گی۔فواد چوہدری نے مزید لکھا کہ پیمرا کو بھی ہدایت کی گئی ہے کہ میڈیا پر بھارتی اشتہارات دکھانے والوں کے خلاف بھی ایکشن لیا جائے۔
راولپنڈی(جی سی این رپورٹ)پاک فوج کے ترجمان میجر جنرل آصف غفور نے اپنی پریس کانفرنس میں بھارتی فضائیہ کی دراندازی سے متعلق تفصیلات سے بھی آگاہ کیا۔ یاد رہے کہ بھارتی ایئر فورس کی جانب سے پاکستان میں دراندازی کی کوشش کی گئی جسے پاک فضائیہ کی بروقت اور مؤثر کارروائی نے ناکام بنایا ہے۔ اس حوالے سے اپنی پریس کانفرنس میں ترجمان پاک فوج میجر جنرل آصف غفور کا کہنا تھا کہ رات کو ہمارا کمبٹ مشن قریب تھا جب سیالکوٹ اور لاہور بارڈر میں پہلی بار بھارتی طیارے ریڈار پر آئے، ہماری فورس نے انہیں چیلنج کیا لیکن وہ قریب نہیں آئے اور اپنی حدود میں رہے۔انہوں نے کہا کہ ایک بھارتی فارمیشن اوکاڑہ بہاولپور سیکٹر میں ریڈار نے نوٹ کی، اگر یہ ہماری کسی بھی ملٹری پوزیشن پر اسٹرائیک کرتے تو ائیرفورس کی فائٹ ہوتی۔ان کا کہنا تھا کہ تیسری کمبٹ ائیرپیٹرول تھا تو تب ہمارے ریڈارز نے دیکھا کہ بھارت کی بڑی ٹیم کرن ویلی مظفر آباد سیکٹر کی جانب سے بڑھ رہی ہے، تیسری کیپ ٹیم نے اس علاقے میں جاکر چیلنج کیا تو یہ واپس بھاگ گئے۔ترجمان پاک فوج کا کہنا تھا کہ ان کی فارمیشن چار سے پانچ ناٹیکل میل اندر آئی جنہيں پاکستان ائیر فورس نے چیلنج کیا، بھارتی طیاروں نے جاتے ہوئے پے لوڈ ڈراپ کیا، ان کے چار بم جبہ کے مقام پر گرے۔انہوں نے مزید بتایا کہ اگر یہ مورچے پر اٹیک کرتے تو فوج اور ائیرفورس تیار ہے، اگر آرمی کی پوسٹ پر اسٹرائیک ہوتی تو یونیفارم اہلکاروں کی شہادت ہوتی لیکن ان کا مقصد سویلین کو نشانہ بنایا تھا تاکہ وہ دعویٰ کرسکیں کہ انہوں نے دہشتگرد کیمپوں پر حملہ کیا۔ان کا کہنا ہے کہ انہيں لائن آف کنٹرول کی طرف آتے ہوئے اور واپس جاتے ہوئے 4 منٹ لگے، اگر ایل او سی پر اسٹرائیک کرتے تو فضائیہ کی فائٹ ہوتی ہے جو نہیں ہوئی۔میجر جنرل آصف غفور نے کہا کہ کہ بھارت نے 350 سے زائد دہشت گردوں کی ہلاکت کا دعویٰ کیا لیکن میں کہتا ہوں کہ کوئی ایک اینٹ بھی نہیں ٹوٹی، اگر وہاں کوئی عمارت ہوتی یا 10 لوگ بھی مرے ہوتے تو وہاں ملبہ ہوتا، لاشیں ہوتی، خون ہوتا لیکن جھوٹ کے کوئی پاؤں نہیں ہوتے۔واضح رہے کہ پاکستان کی قومی سلامتی کمیٹی نے کہا ہے کہ بھارت نے جارحیت کا ارتکاب کیا اور پاکستان وقت اور جگہ کا تعین کر کے اس کا جواب دے گا۔
بیجنگ (جی سی این رپورٹ)چین نے پاکستان میں بھارتی دراندازی کی خبروں پر اپنے ردعمل کا اظہار کردیا ہے ۔چینی وزارت خارجہ کے ترجمان نے موجودہ صورتحال میں بھارت اور پاکستان کو تحمل کا مظاہرہ کرنے پر زور دیا ہے۔ترجمان نے مزید کہا کہ پاکستان،بھارت ایسے اقدامات کریں، جس سےخطےکےحالات مستحکم کرنےمیں مدد ملے۔انہوں نےیہ بھی کہا کہ پاکستان اور بھارت باہمی تعلقات کو بہتر بنانے کی کوشش کریں۔
اسلام آباد(جی سی این رپورٹ)لائن کنٹرول کی خلاف ورزی کے بعد بھارتی میڈیا پر دکھائی گئی نام نہاد حملے کی ویڈیو 3 سال پرانی نکلی۔یاد رہے بھارتی ایئر فورس کی جانب سے گزشتہ رات دراندازی کی کوشش کی گئی جس کے بعد پاک فضائیہ کی بروقت اور مؤثر کارروائی کے بعد بھارتی طیارے اپنا بوجھ گرا کر فرار ہوگئے۔لیکن جنگ کے جنون میں مبتلا بھارتی میڈیا نے اسے سرجیکل اسٹرائیک کا نام دے کر اپنے ہی لوگوں کو بے وقوف بنانے کا سلسلہ جاری رکھا اور یوٹیوب سے 3 سال پرانی ویڈیو نکال کر اسے مذکورہ واقعے سے جوڑنے کی کوشش کی۔بھارتی چینلز پر صبح سے دکھائی جانے والی ویڈیو دراصل 2016 سے یو ٹیوب پر موجود ہے۔ یہ ویڈیو اپ لوڈ ہونے کی تاریخ 23ستمبر 2016 درج ہے اور یہ بھارتی نہیں بلکہ پاکستان ائیرفورس کی نائٹ فلائنگ کی ویڈیو ہے۔پلوامہ حملے میں 40 سے زائد بھارتی اہلکاروں کی ہلاکت کے بعد بھارتی حکومت اور میڈیا بدحواس ہوچکا ہے اور پڑوسی ملک سے مسلسل پاکستان کو سبق سکھانے، سفارتی سطح پر تنہا کرنے اور جنگ کرنے جیسی آوازیں آرہی ہیں۔
گاندھی جی کے سیکورٹی افسر نے کہا تھاہمیں باپو کو غریب دکھانے کے لئے بہت خرچہ کرنا پڑتا ہے۔۔باپو کو عوامی ریل پر سوار کرنے کے لئے ساری ریل کی سیکورٹی چیک ہوتی ہے۔ پورے راستے میں پولیس سیکورٹی سنبھالتی ہے۔ سیکورٹی اہلکاروں کو غریب دیہاتیوں کے بھیس میں ڈبے میں سوار کیا جاتا ہے۔ ان کو پھٹے پرانے کپڑۓ دھو کر پہنائے جاتے ہیں دو چار ننگ دھڑنگ بچے بھی جامعہ تلاشی کے بغد سوار کئے جاتے ہیں۔مسافروں کی پوٹلیوں میں فرسٹ ایڈ کا سامان رکھا جاتا ہے۔ راستے کے تمام سٹاپ پر بغیر وردی پولیس یا فوج کے جوان تعینات ہوتے ہیں جو خفیہ اداروں کے اہلکاروں کے علاوہ کسی کو سوار نہیں ہونے دیتے۔باپو کے ساتھ ٹرین میں سوار ان کی بکری کو انڈے، دیسی گھی، بادام اور چلغوزے اور پتہ نہیں کیا کیا کھلایا جاتا ہے۔ باپو قمیض نہیں پہنتے اس لئے انہیں سردی سے بچانے کے لئے کوئلوں کی انگیٹھی ساتھ رکھنا پڑتی ہے۔ دیہاتی خواتین کے لباس میں دو ٹرینڈ نرسیں ہمہ وقت باپو کی خدمت کے لئے موجود ہوتی ہیں۔تب جا کر چمن میں دیدہ ور پیدا ہوتا ہے اور باپو کا عوامی روپ سامنے آتا ہے۔ ۔۔اب پاکستان میں بھی یہی کلچر سامنے لایا جا رہا ہے۔ 360کنال میں رہنے والے، پرائیویٹ جہاز پر سفر کرنے والے ایک ارب پتی شخص کو غریب دکھانے کے لئے جب ٹی وی سکرین پر پیش کیا جاتا ہے تو اس کی قمیض میں سوراخ کر دیئے جاتے ہیںپھر اس کی بیگم کو پڑھایا جاتا ہے کہ انٹرویو مین کیسے غربت اور مفلسی کا رونا رونا ہے۔ کہ میرے میاں کے پاس تین سوٹ ہیں وہ بھی مانگے تانگے کے ہیںکھانا نوکروں سے مانگ کر کھاتا ہے۔ ناشتے میں ایک بسکٹ اور آدھا رس کھانے کو ملتا ہے۔ پھر سوشل میڈیا پر اس کے یوتھئے اس کی سادگی کی قسمیں کھاتے نظر آتے ہیں۔
اسلام آباد(جی سی این رپورٹ): اپوزیشن جماعتوں نے بھارتی ایئر فورس کی جانب سے دراندازی پر حکومت سے پارلیمنٹ کا مشترکہ اجلاس بلانے کا مطالبہ کیا ہے۔ ڈپٹی اسپیکر قاسم سوری کی زیرصدارت قومی اسمبلی کے اجلاس کے دوران پیپلز پارٹی کے رہنما سید خورشید شاہ نے موجودہ صورتحال پر پارلیمنٹ کا مشترکہ اجلاس بلانے کا مطالبہ کیا اور مسلم لیگ (ن) کے رہنما خواجہ آصف نے اس کی تائید کی۔خورشید شاہ نے کہا کہ ہم حالات جنگ میں آچکے ہیں، اب پارلیمنٹ کو فیصلے کرنے چاہئیں، ایسی کوئی بات نہ کی جائے جس سے اختلاف نظر آئے، ہمیں دنیا اور بھارت کو اپنا اتحاد دکھانا ہے۔خواجہ آصف نے اس موقع پر اظہار خیال کرتے ہوئے کہا کہ آج شام کو ہی مشترکہ اجلاس بلائیں، یہ قومی سلامتی کا مسئلہ ہے تاکہ ایک آواز جائے، ہمارے جوانوں اور افواج کو پتا چلے کہ قوم ان کے ساتھ کھڑی ہے۔خواجہ آصف نے کہا کہ ‘اس وقت سیاست نہ کریں، یہ اتحاد اور قومی یکجہتی کا وقت ہے’۔بھارتی دراندازی کی کوشش پر سیاسی رہنماؤں کی جانب سے بھرپور ردعمل کی آمد کا سلسلہ جاری ہے۔قومی اسمبلی میں قائد حزب اختلاف شہباز شریف نے بھارتی دراندازی کی شدید مذمت کی اور کہا کہ اگر بھارت جنگ شروع کی تو نئی دہلی پر پاکستان کا پرچم لہرائے گا، بھارتی قیادت ہوش کے ناخن لے اور جنوبی ایشیا کے امن کو اپنے ہاتھوں سے آگ میں نہ دھکیلے۔انہوں نے کہا کہ ایک طرف مودی غریبوں کے پاؤں دھو رہے ہیں، دوسری طرف بے گناہ نہتے کشمیریوں کا خون بہارہے ہیں، نریندر مودی جنوبی ایشیا کے بے گناہ انسانوں اورغریبوں کو جنگ کی بھٹی میں نہ دھکیلیں۔پیپلز پارٹی سے تعلق رکھنے والی سینیٹر شیریں رحمان کا کہنا ہے کہ بھارت نے جو طبل جنگ بجایا ہے پاکستان کی مسلح افواج اس کے لیے بالکل تیار ہیں اور بھارت کی جارحیت کا بھرپور اور فوری طور پر جواب دیں گے۔شیریں رحمان نے کہا کہ حکومت کی ذمہ داری بنتی ہے کہ موجودہ صورتحال میں پارلیمان کا فوری طور پر مشترکہ اجلاس بلائے، دنیا کو پیغام دیا جائے کہ ہم جنگ نہیں چاہتے، اگر ہم پر جنگ مسلط کی گئی تو پاکستان اس کے لیے بالکل تیار ہے۔وزیراعظم آزاد کشمیر راجا فاروق حیدر نے بھارتی طیاروں کی ایل اوسی کی خلاف ورزی کی شدید مذمت کی اور کہا کہ عالمی برادری بھارت کا جنگی جنون دیکھ لے، بزدل بھارت رات کی تاریکی میں چھپ کر وار کرنے کی کوشش کرتا ہے، ہم تیار ہیں، جس طرح پاک فضائیہ نے بھارتی طیاروں کو بھگایا وہ قابل داد ہے۔راجا فاروق حیدر نے کہا کہ کشمیری عوام ذرا برابر خوفزدہ نہیں ہیں، 45 لاکھ کشمیریوں کی لاشوں پر سے گزر کر ہی کوئی پاکستان تک پہنچےگا، آزاد کشمیر کے عوام بھارت کا جنگی جنون کئی مرتبہ دیکھ چکے ہیں۔وزیراعظم آزاد کشمیر کا مزید کہنا تھا کہ بھارت مقبوضہ کشمیر کی صورتحال سے توجہ ہٹانے کے لیے جنگی جنون کو ہوا دے رہا ہے، کشمیریوں نے بھی ٹھان لی ہے وہ بھارتی فوج کو سرینگر سے بھگا کردم لیں گے۔دوسری جانب مسلم لیگ (ن) نے موجودہ صورتحال پر پارلیمانی پارٹی کا فوری ہنگامی اجلاس طلب کرلیا جس کی صدارت شاہد خاقان عباسی کریں گے اور اجلاس میں بھارتی جارحیت کے حوالے سے امور پر مشاورت ہوگی۔وزیراعلی سندھ سید مراد علی شاہ نے اپنے بیان میں کہا کہ پاکستان کی افواج دنیا کی بہترین فوج ہیں، اگر بھارت نے جارحیت کی تو پاک فوج اس کا منہ توڑ جواب دے گی۔مراد علی شاہ کا مزید کہنا تھا کہ پاکستان کی عوام ملک کا دفاع کرنا جانتی ہے، ہم پرامن ملک ہیں اور خطے میں امن چاہتے ہیں، ہماری امن پسندی کو کمزوری نہ سمجھا جائے۔
لاہور(جی سی این رپورٹ)پاکستان مسلم لیگ (ن) کے صدر شہبازشریف نے بھارتی حملے کی شدید مذمت کرتے ہوئے کہا ہے کہ بھارت نے جنگ شروع کی تو نئی دہلی پر پاکستان کا پرچم لہرائے گا،ان شاءاللہ۔اپوزیشن لیڈر شہباز شریف نے ایک بیان میں کہا ہے کہ ایک طرف مودی غریبوں کےپاؤں دھورہےہیں،دوسری طرف بیگناہ نہتےکشمیریوں کاخون بہارہےہیں۔انہوں نے کہا کہ بھارتی قیادت ہوش کے ناخن لے،جنوبی ایشیاکے بے گناہ انسانوں اورغریبوں کوجنگ کی بھٹی میں نہ دھکیلیں،نریندرمودی خاکروبوں کے پاؤں دھونے سے بڑا اور عظیم کام کرسکتے ہیں۔انہوں نے مزید کہا کہ پاکستان کی امن پسندی اورتحمل مزاجی کوکمزوری سمجھنابھارت کی سنگین غلطی ثابت ہوگی،پوری قوم بالخصوص پاکستان مسلم لیگ ن کےورکرمسلح افواج کےساتھ مکمل یکجہتی کااظہار کریں۔شہبازشریف نے کہا کہ ہماری مسلح افواج جذبہ شہادت،پیشہ ورانہ مہارت اور بے مثال جرات و بہادری کا پیکر ہیں،ہمیں اپنے بیٹوں،مادر وطن کے سجیلے جوانوں پر ناز ہے،مادر وطن کےتحفظ،دفاع کی خاطرخون بہانے کیلیے میں محاذجنگ پرجانےکیلئےتیارہوں۔
نئی دہلی (جی سی این رپورٹ)بھارتی وزارت دفاع پاکستان میں گزشتہ رات فضائیہ کی کارروائی سے لاعلم نکلی۔بھارتی میڈیا نے وزارت دفاع کا بیان جاری کیا ہے جس میں انہوں نے کہا ہے کہ بھارتی طیاروں کی پاکستانی فضائی حدود کی خلاف ورزی سے متعلق کوئی علم نہیں۔ترجمان بھارتی وزارت دفاع کا کہنا ہے کہ انہیں پاکستانی الزامات کاکوئی علم نہیں کہ بھارتی طیاروں نے پاکستانی فضائی حدود کی خلافورزی کی ۔
راولپنڈی(جی سی این رپورٹ) بھارتی ایئر فورس کی جانب سے دراندازی کی کوشش کی گئی جس کے بعد پاک فضائیہ کی بروقت اور مؤثر کارروائی کے بعد بھارتی طیارے فرار ہوگئے۔ترجمان پاک فوج میجر جنرل آصف غفور کے مطابق بھارتی طیاروں نے مظفر آباد سیکٹر سے دراندازی کی کوشش کی اور طیارے آزاد جموں و کشمیر میں تین سے چار میل تک داخل ہوئے۔ترجمان پاک فوج نے کہا کہ پاک فضائیہ کے بروقت اور مؤثر جواب کے باعث بدحواس بھارتی طیارے اپنے ایمونیشن بالاکوٹ کے قریب گرا کر فرار ہوگئے۔ترجمان پاک فوج نے کہا کہ بھارتی دراندازی کے واقعے میں کوئی جانی یامالی نقصان نہیں ہوا تاہم پاک فضائیہ کی بروقت اور مؤثر کارروائی کے بعد بھارتی طیارے فرار ہوگئے۔میجر جنرل آصف غفور نے بھارتی طیاروں کی جانب سے کھلے علاقوں میں گرائے گئے ہتھیاروں کی تصاویر بھی جاری کردیں۔پلوامہ حملے کے بعد 40 سے زائد بھارتی اہلکاروں کی ہلاکت کے بعد بھارتی حکومت اور میڈیا بدحواس ہوچکا ہے اور پڑوسی ملک سے مسلسل پاکستان کو سبق سکھانے، سفارتی سطح پر تنہا کرنے اور جنگ کرنے جیسی آوازیں آرہی ہیں۔یاد رہے کہ گزشتہ روز سربراہ پاک فوج جنرل قمر جاوید باجوہ نے ایئر چیف مارشل مجاہد انور خان کے ہمراہ ایئر ہیڈ کوارٹرز کا دورہ کیا تھا جس کے دوران ملک کو درپیش خطرات اور بھارت کی جانب سے کسی بھی قسم کی جارحیت پر جوابی حکمت عملی پر تبادلہ خیال کیا گیا تھا۔گورنر پنجاب چوہدری محمد سرور نے اپنے بیان میں کہا ہے کہ اقوام متحدہ کو بھارتی فضائیہ کی دراندازی کی کوششوں کاسخت نوٹس لینا چاہیے۔گورنر پنجاب نے کہا کہ پاکستانی شاہینوں نے دشمن کو ہمیشہ کی طرح منہ توڑ جواب دیا، آج ملکی دفاع کے لیے پوری قوم افواج پاکستان اور حکومت کے ساتھ کھڑی ہے۔
Indian Air Force violated Line of Control. Pakistan Air Force immediately scrambled. Indian aircrafts gone back. Details to follow.
— Maj Gen Asif Ghafoor (@OfficialDGISPR) February 25, 2019
Payload of hastily escaping Indian aircrafts fell in open. pic.twitter.com/8drYtNGMsm
— Maj Gen Asif Ghafoor (@OfficialDGISPR) February 26, 2019
مولانا محمد الیاس گھمن
قرآن منبع ہدایت ہے ، جب اس کی تلاوت تمام آداب ، شرائط اور اس کے حقوق ادا کر کے نہایت غور و خوض سے کی جائے تو اللہ تعالی ہدایت عطا فرماتے ہیں اورعلم و حکمت کے دریا بہا دیتے ہیں۔قرآن کریم کی تلاوت کے احکام میں سے ایک حکم سجدہ تلاوت بھی ہے کہ بعض متعین آیات کریمہ کی تلاوت کرنے اور سننے کے بعد سجدہ کرنا واجب ہوتا ہے۔
سجدہ تلاوت کا طریقہ :
مسئلہ: سجدہ تلاوت کرنے کا ایک طریقہ تو یہ ہے کہ اللہ اکبر کہہ کر سجدہ میں چلا جائے اور اللہ اکبر کہتے وقت ہاتھ نہ اٹھائے ، سجدہ میں کم از کم تین بار سبحان ربی الاعلیٰ کہہ کر اللہ اکبر کہتے ہوئے سر اٹھا لے۔ بس سجدہ تلاوت ادا ہوگیا۔
مسئلہ: بہتر یہ ہے کہ کھڑے ہوکر بغیر ہاتھ اٹھائے پہلے اللہ اکبر کہہ کر سجدہ میں جائیں اور تین مرتبہ سبحان ربی الاعلیٰ کہیں پھر اللہ اکبر کہتے ہوئے کھڑے ہوجائیں، ورنہ بیٹھ کر اللہ اکبر کہہ کے سجدہ میں جائیں تین بار سبحان ربی الاعلیٰ کہیں اور اللہ اکبر کہہ کے بیٹھ جائیں،آپ کا سجدہ تلاوت ادا ہو گیا۔
سجدہ تلاوت کے متفرق مسائل:
مسئلہ: سجدہ کی آیت پڑھنے اور سننے والے دونوں پر سجدہ کرنا واجب ہوجاتا ہے ۔ چاہے سننے والا قرآن شریف کے سننے کی غرض سے بیٹھا ہو یا کسی اور کام میں مشغول ہو اور بغیر ارادہ کے آیت ِسجدہ سن لی ہو، اس لیے بہتر یہ ہے کہ تلاوت کرنے والا سجدہ کی آیت کو آہستہ پڑھے تاکہ کسی اور پر سجدہ واجب نہ ہو۔
مسئلہ: اگر نماز میں سجدہ کی آیت پڑھی مگر نماز ہی میں سجدہ تلاوت ادا نہ کیا تو نماز کے بعد سجدہ کرنے سے سجدہ تلاوت ادا نہ ہوگا اور وہ شخص گناہ گارہوگا اب سوائے توبہ استغفار کے اور کوئی صورت نہیں۔
مسئلہ: امام صاحب سجدہ کی آیت بھول گئے اور مقتدی نے پڑھ کر لقمہ دیا اور امام نے وہ آیت پڑھ کر سجدہ تلاوت کیا تو بس یہ ایک سجدہ ہی کافی ہے الگ الگ دو سجدے کرنا واجب نہیں۔
مسئلہ: نماز میں اگر کوئی شخص آیت سجدہ پڑھے تو فوراً سجدہ کرنا واجب ہے اگر چھوٹی تین آیتیں یا ایک لمبی آیت پڑھ کے سجدہ تلاوت کیا تو آخر میں سجدہ سہو کرنا واجب ہے اگر تین چھوٹی آیات سے کم تلاوت کر کے ہی سجدہ تلاوت کر لیا تو سجدہ سہو واجب نہیں۔
مسئلہ: تروایح میں سجدہ تلاوت کا اعلان کرنا ضروری نہیں ہے۔ اگر اعلان کرے تو منع بھی نہیں لیکن اعلان کرنے کو لازم نہ سمجھا جائے کیونکہ اعلان کرنا ثابت نہیں ۔ہاں اگر مقتدیوں کی نماز میں تشویش پیدا ہونے کا اندیشہ ہو تو اعلان کر دینا بہتر ہے۔
مسئلہ: جس رکعت میں آیت سجدہ پڑھی ہے اس رکعت میں سجدہ کرنا بھول گیا ہے تو دوسری یا تیسری رکعت میں جب بھی یاد آجائے فوراً سجدہ کر لے اور آخر میں سجدہ سہو بھی کرلے۔
مسئلہ: بغیر وضو کے سجدہ تلاوت کرنا جائز نہیں۔
مسئلہ: اگر ایک آیتِ سجدہ تلاوت کی ہے یا سنی ہے تو صرف ایک سجدہ ادا کیا جائے۔ ایک سے زائد نہیں۔
مسئلہ : اگر کئی آیات سجدہ تلاوت کی ہیں یا سنی ہیں تو جتنی تعداد آیات سجدہ کی ہے اتنے ہی سجدے ادا کیے جائیں۔ مثلا اگر 5 آیات سجدہ تلاوت کی ہیں یا سنی ہیں تو صرف 5 سجدے ہی ادا کیے جائیں۔
مسئلہ : فوراً اسی وقت سجدہ کرنا ضروری نہیں لیکن مستحب یہ ہے کہ وضو ہو تو اس وقت سجدہ کر لے شاید بعد میں یاد نہ رہے۔
مسئلہ : جو چیزیں نماز کے لیے شرط ہیں وہ سجدہ تلاوت کے لیے بھی شرط ہیں ، مثلاً وضوکا ہونا، جگہ کا پاک ہونا، بدن اور کپڑے کا پاک ہونا، قبلہ کی طرف رخ کرنا ، وغیرہ
مسئلہ : اگر کسی عورت نے حیض یا نفاس کی حالت میں کسی سے آیت سجدہ سن لی اس پر سجدہ تلاوت واجب نہیں ہوا اور اگر ایسی حالت میں آیت سجدہ سنی کہ مدت حیض یا مدت نفاس پوری ہو چکی تھی لیکن ابھی غسل نہیں کیا تھا تواب سجدہ تلاوت اس پر واجب ہو چکا ہے غسل کے بعد ادا کرنا ضروری ہے۔
مسئلہ: نماز پڑھنے کے دوران کسی اور شخص سے سجدہ کی آیت سنی تو نماز میں سجدہ نہ کیا جائے بلکہ نماز مکمل کر لینے کے بعد سجدہ ادا کریں ۔ اگر نماز ہی میں سجدہ تلاوت ادا کیا تو وہ سجدہ ادا نہیں ہوگا دوبارہ کرنا پڑے گا او رگناہ بھی ہوگا۔
مسئلہ : سجدہ کی کوئی آیت پڑھی اور سجدہ نہیں کیا ، پھر اسی جگہ نماز کی نیت کی وہی آیت نماز میں پڑھی اور نماز میں سجدہ تلاوت کیا تو یہی سجدہ تلاوت کافی ہے ، دونوں سجدے ادا ہوجائیں گے البتہ اگر جگہ بدل گئی ہو تو دوسرا سجدہ کرنا واجب ہوگا۔
مسئلہ : اگر کوئی شخص کسی امام سے آیت سجدہ سننے کے بعد اس کی اقتداءکرے تو اس کو امام کے ساتھ سجدہ کرنا چاہیے اور اگر امام سجدہ کر چکا ہو تو دو صورتیں ہیں:
پہلی صورت: جس رکعت میں امام نے آیت سجدہ تلاوت کی ہو، وہی رکعت اس کو اگر مل جائے تو اس کو سجدہ کرنے کی ضرورت نہیں اس رکعت کے مل جانے سے یہ سمجھا جائے گا کہ وہ سجدہ مل گیا۔
دوسری صورت: وہ رکعت نہ ملے تو نماز پوری کرنے کے بعد سجدہ کرنا واجب ہے۔
مسئلہ اگر آیت سجدہ کی تلاوت کے فوراً بعد یا دو تین آیا ت پڑھ کر رکوع کیا اور اس میں نیت سجدہ تلاوت کر لی تو سجدہ تلاوت ادا ہوجائے گا اور مقتدیوں کی بھی نیت کرنے کی ضرورت ہے بغیر نیت کے ان کے ذمہ سے سجدہ تلاوت ادا نہ ہوگا اور تین آیات سے زیادہ تلاوت کر لی تو اب رکوع میں نیت کرنے سے سجدہ تلاوت ادا نہ ہوگا۔
مسئلہ : اگر کسی آدمی کے ذمہ میں بہت سارے سجدہ تلاوت باقی رہ گئے اور اب بیماری کی وجہ سے زمین پر سجدہ کرنے پر قادر نہیں رہا تو اب وہ جس طرح نماز کا سجدہ اشارہ سے کرتا ہے ، سجدہ تلاوت کا سجدہ بھی اسی طرح اشارہ سے کرنے سے ادا ہو جائےگا ، اس کے بجائے فدیہ دینا کافی نہیں اور تاخیر کی وجہ سے توبہ استغفار لازم ہے۔ آیت سجدہ کا ایک جز بھی تلاوت کر لیا تو سجدہ کرنا واجب ہو جاتا ہے اگرچہ پوری آیت تلاوت نہ کی ہو۔ اگر مکروہ اوقات میں یعنی طلوع آفتاب غروب شمس اور زوال کے وقت آیت سجدہ تلاوت کی گئی تو ان اوقات میں سجدہ تلاوت کرنا جائزہے مگر یہ مکروہ ہے ، افضل اور بہتر یہ ہے کہ مکروہ اوقات نکل جانے کے بعد سجدہ کرے۔
لاہور(جی سی این رپورٹ)کسٹمز حکام نے لاہور ایئرپورٹ سے 7 کلو ہیروئن قطر اسمگل کرنے کی کوشش ناکام بنادی۔کسٹمز حکام کے مطابق غیر ملکی ایئر لائن کی دوحہ جانے والی پرواز کے ذریعے ایک نجی کمپنی کی جانب سےکنسانمنٹ بک کرائی گئی تھی جس کی تلاشی لی گئی تو اس میں سے 7کلو ہیروئن برآمد کرلی گئی۔کسٹم حکام کے مطابق ہیروئن پیکٹوں میں بھر کر بیڈ شیٹوں کی کنسائنمنٹ میں چھپائی گئی تھی جسے قبضے میں لے کر مزید کارروائی شروع کردی گئی ہے۔
وہاڑی (جی سی این رپورٹ )میلسی سدھنائی لنک نہر 84 پل کے قریب گھریلو ناچاقی پر ماں نے اپنی 2 کم سن بیٹیوں کو نہر میں پھینک دیا۔ریسکیو وہاڑی کے مطابق ضلع خانیوال کے تھانہ چھب کلاں کی حدود 84 پل پر نواحی گاؤں 85 پندرہ ایل کی رہائشی سنگ دل ماں رخسانہ شبیر نے اپنی 3 بیٹی کائنات اور 7 سالہ عائشہ کو سدھنائی میلسی لنک کینال میں پھینک دیا ۔پولیس نے ماں اور اس کے مبینہ آشنا کو گرفتار کرکے کاروائی شروع کر دی ہے، ریسکیو وہاڑی اور خانیوال کی ٹیمیں نہر سے بچیوں کو تلاش کر رہی ہیں ۔
واقعہ کی اطلاع ملتے ہی ریسکیو وہاڑی اور خانیوال کی ٹیمیں موقع پر پہنچ گئیں اور انہوں نے بچیوں کو نہر سے نکالنے کے لئے تلاش کا عمل شروع کر دیا ہے جبکہ پولیس نے ملزمہ رخسانہ بی بی کو اس کے مبینہ آشنا قمر عباس سمیت گرفتار کر کے تفتیش شروع کر دی ہے۔پولیس کے مطابق رخسانہ شبیر کا شوہر سعودی عرب میں مقیم تھا جس کا اس سے لڑائی جھگڑا رہتا تھا۔
اسلام آباد(جی سی این رپورٹ)پاکستان مسلم لیگ(ن) کی ترجمان اور سابق وزیر اطلاعات مریم اورنگزیب نے وفاقی وزیر اطلاعات فواد چوہدری کی دعوت پر ان کے چیمبر میں ان سے ملاقات کی۔مریم اورنگزیب نے فواد چوہدری سے ملاقات میں پاکستان ٹیلی ویژن (پی ٹی وی) بحران سے متعلق تبادلہ خیال کیا۔ذرائع کے مطابق سابق وزیر اطلاعات اور فواد چوہدری کے درمیان پی ٹی وی کے مینیجنگ ڈائریکٹر( ایم ڈی) ارشد خان کے تقرر سے متعلق امور زیر غور آئے۔ملاقات میں مریم اورنگزیب نے کہا ایم ڈی پی ٹی وی کی تعیناتی غیر قانونی طور پر ہوئی جس پر فواد چوہدری نے ان کے موقف کو سراہا۔ذرائع کے مطابق فواد چوہدری نے مریم اورنگزیب سے سابق ایم ڈی پی ٹی وی عطاالحق قاسمی کیس کے حل میں آگاہی لی۔پاکستان مسلم لیگ (ن) کی ترجمان نے وزیر اطلاعات سے پی ٹی وی ملازمین اور پنشنرز کو درپیش مسائل کے حل کا مطالبہ کیا جس پر فواد چوہدری نے انہیں یقین دلایا کہ پی ٹی وی ملازمین کے مسائل کو جلد حل کیا جائے گا۔مریم اورنگزیب نے وفاقی وزیر اطلاعات سے ملاقات سے متعلق جاری کیے گئے بیان میں کہا کہ انہوں نے وزیر اطلاعات کی توجہ فلم اور کلچرل پالیسی پر عملدرآمد میں تاخیر کی جانب مبذول کروائی۔انہوں نے کہا کہ اطلاعات تک رسائی کے حق سے متعلق کمیشن کے حوالے سے بھی تاحال عملدرآمد کا مرحلہ درپیش ہے۔مریم اورنگزیب نے کہا کہ انہوں نے وزیر اطلاعات کو اپوزیشن کی جانب سے ان مسائل کے حل کے حوالے سے تعاون کی یقین دہانی کرائی۔ترجمان مسلم لیگ(ن) نے وزیر اطلاعات سے پاکستان میڈیا ریگولیٹری اتھارٹی کے قیام کا معاملہ قومی اسمبلی کی قائمہ کمیٹی برائے اطلاعات میں لانے پر زور دیا۔
نئی دہلی (جی سی این رپورٹ)سابق بھارتی کپتان ساروو گنگولی نے کہا کہ بھارت اگر چاہے بھی تو پاکستان کو کرکٹ ورلڈ کپ سے باہر نہیں کروا سکتا۔14 فروری کو مقبوضہ کشمیر کے ضلع پلوامہ میں ہونے والے حملے کے بعد بھارت کی جانب سے پاکستان کے خلاف نا صرف سیاسی محاذ کھولا گیا بلکہ تجارت اور اداکاروں پر پابندیوں کے علاوہ کھیل کے میدان میں بھی پاکستان کو نشانہ بنایا گیا۔بھارتی کرکٹ بورڈ کے حکام کی جانب سے نا صرف آئی سی سی سے ورلڈ کپ میں پاکستان سے میچز نہ کھیلنے سمیت پاکستان کو ورلڈ کپ سے باہر کرنے کی باتیں بھی سامنے آئیں۔لیکن بھارت کو پاکستان کے حوالے سے نا صرف بین الاقوامی سطح پر حزیمت کا سامنا کرنا پڑا بلکہ خود بھارت میں بھی بڑے پیمانے پر مودی سرکار کو تنقید کا نشانہ بنایا جا رہا ہے۔بھارتی وزیراعظم نریندر مودی کی جانب سے خاکروبوں کے پاؤں دھونے کی ویڈیو سامنے آنے پر بھارتی اداکار اور سیاستدان راج ببر نے مودی کو ڈرامے باز قرار دیتے ہوئے کہا کہ اچھا ہوتا کہ مودی جی ان ضرورت مندوں کو کپڑے دلا دیتے۔راج ببر نے نریندر مودی کا مذاق اڑاتے ہوئے کہا کہ سوشل میڈیا پر لوگ تو یہاں تک کہہ رہے ہیں کہ مودی کے پیر دُھلانے کے دوران کسی خاتون کی پائل کھو گئی ہے، وہ ایف آئی آر کٹانے گئی ہے۔سابق بھارتی کپتان ساروو گنگولی بھی اب میدان میں آگئے ہیں اور ان کا کہنا ہے کہ بھارت چاہے بھی تو پاکستان کو کرکٹ ورلڈ کپ سے باہر نہیں کر سکتا۔گنگولی نے کہا کہ آئی سی سی بھارت کے دباؤ میں ایسا کوئی فیصلہ نہیں کرے گا، ایک فیصد بھی امکان نہیں کہ آئی سی سی بھارت کی بات مان لے۔
لاہور(جی سی این رپورٹ)سابق وزیراعظم نوازشریف کی صاحبزادی مریم نواز نے اسلام آبادہائی کورٹ کے فیصلے سے قبل کہا کہ‘‘دعاشاکرتومنگی رکھ ،دعاجانے خداجانے’’۔ سابق وزیراعظم نوازشریف کی العزیزیہ ریفرنس میں سزامعطلی کی درخواست پر محفوظ فیصلہ سے قبل مریم نواز نے سماجی رابطے کی ویب سائٹ پر ٹوئٹ کیا جس میں کارکنوں سے دعاکی درخواست کرتے ہوئے کہاکہ ‘‘دعاشاکرتومنگی رکھ دعاجانے خداجانے ’’۔
دعا شاکر تو منگی رکھ
دعا جانے خدا جانے 🤲🏼— Maryam Nawaz Sharif (@MaryamNSharif) February 25, 2019
پاکستان کے زیر انتظام کشمیر کی پولیس نے ایک اعلامیے میں 18 مفرور قیدیوں کی تلاش میں عوام سے مدد کی اپیل بھی کی ہے اور درست اطلاع دینے پر مجم...
جملہ حقوق ©
WAKEUPCALL WITH ZIAMUGHAL
Anag Amor Theme by FOCUS MEDIA | Bloggerized by ZIAMUGHAL